नेपालमै उल्लेख्य दर्शक उपस्थिति रहने प्रतिष्ठित फुटबल प्रतियोगिता झापा गोल्डकप नेपाली फुटबलको विकास, प्रवर्द्धन र उन्नयनमा निरन्तर योगदान दिँदै आएको एक ऐतिहासिक र लोकप्रिय प्रतियोगिता हो। पूर्वी नेपालको झापा जिल्लाबाट सुरु भएको यो प्रतियोगिता आज देश–विदेशमा परिचित फुटबल महोत्सवका रूपमा स्थापित भइसकेको छ।
झापा गोल्डकपको सातौँ संस्करण २०८२ साल माघ २४ गतेदेखि फागुन ४ गतेसम्म बिर्तामोडस्थित डोमालाल राजवंशी रङ्गशालामा सञ्चालन हुँदैछ। यस संस्करणलाई यसपटक स्वर्गीय विनोद बस्नेत स्मृति झापा गोल्डकप का रूपमा आयोजना गरिँदैछ।
यस प्रतियोगितामा आयोजक झापा–११ फुटबल क्लब सहित नेपालका चर्चित ‘ए’ डिभिजन तथा विभागीय क्लबहरूको सहभागिता रहनेछ। साथै, भारत र भुटानका प्रतिष्ठित फुटबल क्लबहरूको समेत सहभागिताले प्रतियोगितालाई अन्तर्राष्ट्रिय स्तरको प्रतिस्पर्धात्मक बनाउनेछ।
अघिल्ला संस्करणहरूको सफलतापछि आयोजकले यसपटक पुरस्कार राशिमा समेत वृद्धि गरेको छ। सातौँ संस्करणको विजेता टोलीले १५ लाख रुपैयाँ तथा उपविजेता टोलीले ७ लाख ५० हजार रुपैयाँ पुरस्कार प्राप्त गर्नेछन्।
पूर्वका दर्शकहरूमाझ अत्यन्त लोकप्रिय झापा गोल्डकप प्रत्यक्ष प्रसारणमार्फत देश तथा विदेशमा लाखौँ दर्शकले अवलोकन गर्दै आएका छन्। दर्शकको उत्साह, मैदानको वातावरण र प्रतिस्पर्धात्मक खेल यस प्रतियोगिताका मुख्य आकर्षण हुन्।
झापा गोल्डकपसँग हालसम्म ६५० भन्दा बढी संस्थापक सदस्यहरू आबद्ध छन्। प्रतियोगिताको बढ्दो लोकप्रियतासँगै नयाँ फुटबलप्रेमीहरू सदस्यतामा जोडिँदै गएका छन्, जसले यसको संस्थागत आधारलाई अझ मजबुत बनाएको छ।
झापा गोल्डकपको पाँचौँ संस्करणलाई ऐतिहासिक रूपमा सफल बनाउन नेतृत्वदायी भूमिका निर्वाह गरेका पूर्व अध्यक्ष स्वर्गीय विनोद बस्नेतको सम्मान र स्मृतिमा सातौँ संस्करण आयोजना गरिँदैछ।
सरोकारवाला निकायहरूको सहयोग, सदस्यहरूको सक्रियता र दर्शक महानुभावहरूको स्नेहले झापा गोल्डकपलाई प्रत्येक वर्ष झन् भव्य, व्यवस्थित र ऐतिहासिक बनाउँदै लैजाने प्रतिबद्धता आयोजक परिवारको छ।
झापा गोल्डकप — नेपाली फुटबलको उत्सव, पहिचान र भविष्य।